LO BICENTENARI ES ACABAT !

Napoleon à Montalban

En l'annada commemorativa del bicentenari de la creacion del Tarn e Garona (2008), l’Académia de Montalban a portat un agach novèl sul poèma "Napoleon a Montalban", que balha totes los detalhs sus la jornada del 29 de julhet de 1808. Edoard Forestièr l’aviá fach pareisser dins lo Butletin de la Societat arqueologica en 1908 : èra una compilacion de las doas còpias conegudas (degun sap ont es passat l’original). Aqueste còp, la grafia n’es estada normalisada per Estève Bordoncle e Norbèrt Sabatièr a balhat una revirada en vèrses, aprèp una pichona presentacion critica.
En mai del poèma occitan de Constans-Manàs*, ambe la revirada francesa, d’imatges inedits son publicats dins aqueste libròt de 66 paginas, a començar per las armas de la bona vila de Montalban, de las tres abelhas en plaça de las tres flors de liri. I a tanben una gravadura del fons Forestièr que representa l’emperaire a caval, saludat par un fòc d’artifici**.

* En fach, aquel poèma signat B.C.M. seriá de Bagel-Calvet-Martignac (cf. Butletin Arqueologique e Istorique de la Societat Arqueologica de Tarn e Garona, p. 346)

**On se pòt crompar lo libròt alprèp de l'associacion Antonin-Perbòsc, rota de Montèg a Montalban, al prètz de 10 euros, o pel biais d'aqueste siti : www.academiemontauban.fr (Publicacions) ont se pòdon trapar fòrça causas en rapòrt ambe la lenga nòstra.